Aaafm Brünnschdaaa droom

Umma dreiväddl sechse hammasi am Zänndorfer Hallnbod droffn um an Ausfluuch in die Berch zu machn. Väzzg Leid wamma gween. Wenn die Spenglers Mudda net nu ausam Bus nausghubbft wär, walls gmaand hodd ihr Audo wär net richti zougschberrd gween, wärma pinktli um sechse wechkumma, so hamma scho widda siemahalb Sekundn Verschbäätung ghabbt.

Sunst is aaf der Fadd obba alles glatt gloffn, des haßd bis kotz bevur ma doddn woarn, weil nämmli wie der Bus die Sudlfeldstraß naafkurvt is, is an vo de glann Boum schlecht worn und er wollt sie vonn hiehoggn, daßa aufd Straß nausschaua ko.  Aber su weit haddas garnet gschaffd und zack, hodd der Fritz, unser Busfahra und die glaa Larissa scho dementschbrechend ausgschaud. Die andern Kinder die vonn ghoggt warn sinn voller Panik nach hintn grennt, der Fritz hodd su dou wie wenn nix gween wär. Isn ja a nix anderschd ibri bliem, weil ohne Fahrer wär wahrscheins der Bus die Straß net naafkumma bei denna hafftn Kurvn.

Wäima dann doddn worn hodd der Vadder vo dem Boum mim Fritz den Bus widda sauba gmacht und mir hamm endli lousgäih kenna. Glei am Ofang simma annam Wassafall vurbeikumma.  Dou hamms alle in den Wassafall neigloddzd, als obs nu nie a Wassa gsehn häddn, daweil sin däi fast alle ausm Schwimmverein gween, wos es ganze Joar im Wassa ummananda blanschn dänna.  Der Weech iss dann ganz schee schdeil worn und die Kinder vornn hamm su a Tembo vurgleechd, daß hintn die Erwachsna reihnweis abblatzt sinn, obwohl  daß dess da vornn blous die achd und neunjährigen Madli woan.  Nou is uns eigfalln, daß des ja unsre Schbiddzndriathledinna woan und däi hamm nadirli zaing mäin was draff hamm, wenns next Joar widda am Drebbla schdeh wolln.

Nou iss der Weech abba imma schwiericha worn und für die glann hamma dann an Kleddagodd ausbaggd und so a Zeich woma si ins Drahtseil eihänga ko. Aber des häddma lieba fir die Alldn hernehma solln, weil dou sin nämmli anne ganz schee ins schwidzn kumma und des ned blous weil die Sunna neibrennd hodd wie bleed.  Däi Kinder dageeng sind da naafgrummbld wie wenns suwass scho zwanzg mol gmachd häddn.

Mir warma sovill Leid gween, das anne die den Schdeich nolaafm hamm wolln, iberhabbts net nokumma sinn weil ständich anne vo uns entgeeng kumma sinn. Dann wahma endli droom am Brünnschdaa (sechsehundertzwanzg Meda houch), un hamm uns die Weld vo ohm ogschaut. Schäih wor des dou herohm, lauda Berch und Täla hat ma gsehn, sugoar den Großvenedicher. Mit der Bercheinsamkeit was nadirli nix, weil außa uns hamm nu mehra die Idee ghabbt da nauf zu hatschen. Blatzkaddn hamma obba kanne brauchd.

Am Rückwech simma dann nu am Brünnsschdaahaus eikehrt und die Kinder hamm derweil vesuchdd die Feldsbroggn mit Schdaa zu zertrümmern, des hamms obba in der koddzn Zeit dann doch net gschafft. Mir ham nämli widder waida mäin wall etz die ander Grubbn mit die fünf und sechsjärichen dabei war, däi wo bloß bis zum Brünnschdaahaus ganga sin. Däi sin nadirli ned so schnell wäi die Greßßern. Hamma jedenfalls gmaand, weil nowärdds sin däi ganauasu grennd.

In den Abschdiech zum Bargblatz Rosengasse hamma exdra Geenganschdiech neibaud damits net vorn widda alle davo renna wie letzt Joar, gnudzd hodd des obba nix.

Su hamma obba nu Zeit ghabbt, daßma im Wirtshaus schee gmiadli beinannda hoggn hamm kenna und hamm uns ausgruhd vo dera neunhunderd Höhnmeder duur. Auf amal worn däi Glann verschwunden gween. Nou warn däi draßßn im Finstern und hamm mit die schwern Wanderschuh nu Schdehbogg-Freibogg gschbilld. Ja hamms denna a Duracellbaddrie neiobbarierd oder was? Naja, näxd mal machma den Kaa zwoo, und dann werma mal schaun obs danach im Basislager nu Fangalenns schbilln.  

Im ledznd Moment is dann nu die Spychala Agnes und ihr Thomas daherkumma, däi waorn nämli nu aafm Großen Traithen(achzehhunderdnuwas), weil die Agnes wolld si am Brünnschdaahaus ned herhoggn weils Angst ghabbt hadd, daß ihr Bluddrugg dann zu schdark absaggd. Der Duurnlaider hodd des nadirli ned verantwoddn kenna und hadds dann da naafgschiggt, obwohla selba nu nie da droom war. Godd sei dank hamm däi des nu gschaffd, weil sunnsd häddma si glatt verabschiedn mäin.

Um sieme is nämli unser Bus widda zrigg aaf Zänndorf gfahrn. Schäih waors widda gween und näxd Joar gemma am zwaarazwanzigstn Oktoba übern Roßschdaa zur Techernsea Hüddn, dou wädds dann a widda su schäi!